მსოფლიო მასშტაბით გავრცელებული კორონავირუსის ეპიდემია მნიშვნელოვნად იმოქმედებს როგორც განვითარებულ, ასევე განვითარებადი ქვეყნების ეკონომიკებზე. შესაბამისად, ჩვენი საზოგადოება დგას სერიოზული გამოწვევის წინაშე და საქართველოს მთავრობას მივმართავთ, რომ შეძლებისდაგვარად მოკლე ვადებში შესთავაზოს ბიზნესს – შესაბამის სექტორებს 3 თვიანი საშეღავათო გადაწყვეტილებები, რომელთა მეშვეობითაც მცირე და საშუალო ბიზნესი იქნება დაცული.

ვინაიდან, კორონავირუსთან დაკავშირებით, უახლოეს თვეებში საქართველოში არსებულ სასტუმროებში ჯავშნების დიდი ნაწილი გაუქმებულია; ასევე საქართველოს საზღვრის კვეთისას დაწესებულია გარკვეული შეზღუდვები; სხვადასხვა ქვეყნების მიმართულებით დროებით შეჩერებულია ფრენები და ახლო მომავალში მოსალოდნელია საერთაშორისო ვიზიტორების კლება,  ვფიქრობთ, რომ განსაკუთრებული მხარდაჭერა ესაჭიროება ტურიზმსა და ჰორეკას სექტორს (HoReCa – სასტუმროები, რესტორნები, კაფეები).

აღნიშნული მხარდაჭერა მთავრობის მხრიდან ამ ეტაპზე სასურველია მოიცავდეს ადგილობრივი და/ან საერთო-სახელმწიფოებრივი გადასახადების 3 თვით გადავადებას ან შემცირებას.